TIRANË — Detaje të reja janë zbardhur lidhur me dosjen e organizatës kriminale të drejtuar nga Franc Çopja dhe Elvis Çela, e cila u dërgua për gjykim nga SPAK me 16 të pandohur për trafikimin e mbi 60 tonëve kokainë.

Gjatë një emisioni televiziv, gazetari Eni Ferhati publikoi një fotografi që shfaq rreth 12 milionë euro të vendosura në dyshemenë e një banese në Peqin. Sipas gazetarit, paratë në fjalë nuk janë sekuestruar realisht nga autoritetet, por fotot janë marrë nga komunikimet e kryera përmes platformave të enkriptuara ku pjesëtarët e grupit flisnin lirshëm për operacionet e tyre. Organi i akuzës ka dokumentuar gjithashtu përdorimin e avionëve të vegjël sportivë për transportimin e deri në 500 kg kokainë për udhëtim, si dhe investimin e fitimeve në lingota ari.

Gazetari sqaroi se Elvis Çela kishte ngritur bazën e tij në Paraguaj gjatë kohës që ndodhej nën masën "arrest shtëpie" në Itali, duke vijuar drejtimin e trafikut të drogës drejt Europës. Transporti i sasisë prej 2 deri në 3 tonë kokainë në ditë kishte bërë që laboratorët e prodhimit në Bolivi të mos përballonin dot kërkesat e organizatës shqiptare, e cila kishte krijuar lidhje direkte me eksponentë të kërkuar ndërkombëtarisht si Sebastian Enrique Marset.