Tiranë, 11 nëntor 2026 – Numri i lindjeve në Shqipëri ka zbritur në 5,787 në tremujorin e tretë të vitit 2026, duke shënuar një rënie prej 10.5% në krahasim me të njëjtën periudhë të vitit të kaluar.

Sipas të dhënave zyrtare të INSTAT, ky është niveli më i ulët i regjistruar për këtë periudhë të vitit që nga viti 2011, kur raportohen të dhënat periodike, ndërsa shtesë natyrore pozitive shënojnë vetëm qarqet Tiranë dhe Durrës.

Shifrat e institucionit evropian të statistikave, Eurostat, konfirmojnë se Shqipëria mban nivelin më të lartë të rënies së lindjeve në Evropë gjatë tri dekadave të fundit. Për periudhën 1997–2025, numri i lindjeve në vend është tkurrur me 63.5%, nga 61.7 mijë në vetëm 22.5 mijë lindje në vit.

E ekspertëve të demografisë dhe ekonomisë lidhin këtë tkurrje drastike me emigracionin masiv të popullsisë së re, shtyrjen e moshës së martesës, koston e lartë të jetesës dhe pamjaftueshmërinë e bonusit financiar të lindjeve për të mbuluar shpenzimet afatgjata të fëmijëve.

Sipas të dhënave të INSTAT, popullsia e Shqipërisë në fillim të vitit 2026 zbriti në 2.336 milionë banorë, me një rënie prej 1.16% brenda një viti. Ndërkohë, mosha mediane e popullsisë arriti në 45 vjeç, duke përshpejtuar plakjen demografike dhe duke krijuar rreziqe serioze për tregun e punës dhe qëndrueshmërinë e skemës së pensioneve.