Tiranë, 10 nëntor 2026 – Analistët Nora Malaj dhe Ilir Demaliaj ishin të ftuar në episodin më të fundit të emisionit “Topin e kam unë” me Grida Dumën, ku u përfshinë në replika të ashpra me të rinjtë e panelit mbi protestat, tranzicionin politik dhe mënyrën e analizimit të zhvillimeve në vend.

Gjatë diskutimit, ish-zëvendësministrja Nora Malaj pranoi dështimin e brezit të saj për ndërtimin e një shteti funksional pas rënies së diktaturës:

“Ne kemi një faj, jo gabim, që në 36 vite e lamë vendin në tranzicion, nuk ndërtuam sistem. Unë kam ngrënë gaz lotsjellës, kam lëvizur mes plumbave të 1997-ës. Nuk e mbyllëm tranzicionin për të ndërtuar shtetin. Kjo shkaktoi metamorfozë dhe mbi 40% nuk deshën të votonin, hoqën përgjegjësinë dhe i dhanë pushtetin një partie. Nëse ne prindërit tuaj do të kemi të gjitha pushtetet, nuk ju dëgjojmë më, kthehet vetë në diktaturë. Bashkëbisedimi juaj më duket si ‘Liza në botën e çudirave’. Një ditë ishte Macja që ulëriti se i kanë kafshuar bishtin, në fakt e kishte kafshuar vetë. Ne jetojmë dy breza bashkë, por çfarë do të bëjmë. Ne brezi ynë e bëmë revolucionin, por nuk e çuam të plotë. Na bëri realizmi makiavelist dhe kishim frikë.”

Nga ana tjetër, analisti Ilir Demaliaj u përfshi në debate të drejtpërdrejta me të rinjtë e panelit, duke u kontestuar nga ata për mbrojtje të mazhorancës politike. Pas akuzave të panelistëve të rinj se paneli mbron qëndrimet e pushtetit, Demaliaj reagoi duke iu përgjigjur kritikave mbi rrjetet sociale dhe financimet e tij:

“Ti Kejdi, qëllimi yt është se je influencer dhe… Ju keni dalë në TV dhe keni dalë të thoni se ju kanë marrë lekë për diploma. Ti nuk e di se nga paguhem unë, unë 35 vjet nuk kam qenë në këtë vend. Të kam parë këtu në emision, të duket vetja shumë lart. E ke fryrë shumë gomën.”

Replikat u thelluan pasi të rinjtë Danjeli, Artemisa dhe Kejdi ngritën shqetësime për varfërinë, dhunën policore dhe përdorimin e propaganda-s në rrjetet sociale. Përplasja u moderua nga Grida Duma, e cila theksoi se përballja e mendimeve kundër kërkon taban fjale dhe argumente, e jo mbyllje goje.