Kryeministri i Kosovës, Albin Kurti, i ka bërë thirrje udhëheqjes së re të Serbisë që të pranojë pavarësinë e Kosovës dhe të mbajë përgjegjësi për ngjarjet e sigurisë në veri të vendit.

Gjatë një bashkëbisedimi me studentët në "Paris School of International Affairs" (PSIA), Kurti kërkoi prerazi dorëzimin e Milan Radoiçiçit, të cilin e cilësoi si organizatorin kryesor të sulmit terrorist në Banjskë ku mbeti i vrarë një efektiv i Policisë së Kosovës. Kryeministri theksoi se Beogradi duhet të ndërpresë menjëherë edhe fushatën e tij kundër njohjeve ndërkombëtare të Kosovës.

“Ky duhet të jetë gjithashtu një proces përmes të cilit qeveria e Serbisë, e cila së fundmi ka kaluar nëpër një ndryshim të udhëheqjes, të arrijë ta njohë realitetin e shekullit XXI: Kosova është shtet i pavarur, i njohur nga mbi 120 shtete,” deklaroi Kurti.

Në fjalën e tij, kreu i qeverisë së Kosovës nënvizoi gjithashtu rëndësinë e marrjes së njohjes nga pesë shtetet anëtare të Bashkimit Evropian dhe katër vendet e NATO-s që ende nuk e kanë ndërmarrë këtë hap.

“Besojmë se ato duhet ta kuptojnë se rrethanat në të cilat lindi vendi ynë, represioni, spastrimi etnik dhe gjenocidi që përjetoi populli ynë, nuk mund të barazohen thjesht me lëvizjet separatiste me të cilat nganjëherë bëhen paralele,” u shpreh ai.