Tiranë, 10 nëntor 2026 – Rruga e re Tiranë-Durrës pritet të hapet për qarkullimin e automjeteve gjatë dy muajve të parë të vitit 2027. Lajmi është bërë i ditur nga Ministri i Infrastrukturës dhe Energjisë, Enea Karakaçi.

Gjatë një interviste televizive, Karakaçi deklaroi se kanë përfunduar punimet për 5 kilometrat e parë të zgjerimit të këtij aksi kryesor, ndërsa po punohet intensivisht për vijimin e projektit deri mbi Qafën e Kasharit. Ministri bëri me dije se programi afatmesëm 2027-2029 parashikon financimin e plotë të zgjerimit të superstradës deri në zonën e Urës së Dajlanit në Durrës.

“Patjetër që rreth dy muajve të parë të 2027 ajo do të jetë e hapur për qarkullim. Por ajo çfarë është e rëndësishme për buxhetin dhe programin afatmesëm të ministrisë, është që zgjerimi i kësaj superstrade është i financuar tërësisht dhe ne vazhdojmë në vitet 2027-2028 me zgjerimin pothuajse deri në Durrës,” u shpreh Karakaçi.

Në lidhje me aksin tjetër të rëndësishëm Tiranë-Ndroq-Plepa, ministri bëri të ditur se kanë përfunduar 5 kilometrat e parë dhe janë lidhur kontratat për 10 kilometra të tjerë, ndërsa buxheti i vitit 2027 parashikon përmbylljen e plotë të financimit për këtë projekt rrugor.