Karabinierët në Tor San Lorenzo të Italisë kanë arrestuar dy shtetas shqiptarë, 26 dhe 20 vjeç, nën akuzën e mbajtjes dhe shpërndarjes së lëndëve narkotike, në kuadër të dy operacioneve të ndryshme të zhvilluara brenda 24 orëve.

Ndërhyrja e parë u krye në bulevardin San Lorenzo, ku efektivët vunë re 26-vjeçarin duke i dorëzuar një personi tjetër një pako të vogël përmes portës së një banese. Pas ndjekjes nga policia, ai u ndalua në qytetin e Aprilias, në rrugën Adda. Gjatë kontrollit të automjetit, autoritetet sekuestruan:

12 gramë kokainë, të ndarë në 26 doza;

2 gramë crack, në 4 paketime;

3 gramë hashash, të ndarë në 4 paketime.

Operacioni i dytë u zhvillua ditën pasuese, kur karabinierët ndaluan gjatë drejtimit të automjetit një tjetër shtetas shqiptar, 20 vjeç. Gjatë kontrollit të mjetit, efektivët zbuluan të fshehura:

10 gramë kokainë, të ndarë në 27 doza;

3 gramë crack, në 5 doza;

2 gramë hashash;

1 gram marijuanë.

Të dy të arrestuarit, banues në Aprilia, ndodhen tashmë në dispozicion të autoriteteve gjyqësore italiane për veprën penale të prodhimit dhe trafikut të lëndëve narkotike.