Dialogu i 2-të Strategjik Ekonomik dhe Financiar Kinë-Kanada u mbajt të hënën në Vankuver. Zëvendëskryetari i Këshillit të Shtetit dhe përfaqësuesi kryesor për dialogun, He Lifeng, bashkëkryesoi dialogun me përfaqësuesit kryesorë të palës kanadeze, ministrin e Financave Francois-Philippe Champagne dhe ministrin e Tregtisë Ndërkombëtare Maninder Sidhu.

He tha se ky dialog është një masë konkrete për zbatimin e konsensusit të rëndësishëm të arritur nga liderët e të dy vendeve, duke shtuar se vendi i tij është i gatshëm të punojë me Kanadanë, duke u mbështetur në parimet e respektit të ndërsjellë, barazisë, përfitimit të ndërsjellë dhe kërkimit të të përbashkëtave duke lënë mënjanë dallimet, për të thelluar bashkëpunimin në fusha si ekonomia e tregtia, financat dhe investimet, për të promovuar zhvillimin e qëndrueshëm dhe të shëndetshëm të marrëdhënieve ekonomike mes dy shteteve dhe për të kontribuuar në formimin e një lloji të ri partneriteti strategjik midis dy vendeve.

Champagne nga ana e tij vuri në dukje se Kanadaja u kushton rëndësi të madhe marrëdhënieve të saj me vendin e dytë më të fuqishëm në botë.

Ai shtoi se vendi i tij është i gatshëm të punojë me palën kineze për të zbatuar konsensusin e arritur nga liderët e të dy vendeve, për të forcuar komunikimin dhe koordinimin e politikave dhe për të thelluar bashkëpunimin me dobi të ndërsjellë në fushat ekonomike dhe financiare.

Kurse Sidhu tha se Kanadaja është e gatshme të zgjerojë më tej bashkëpunimin praktik me Kinën në sektorët e tregtisë dhe ekonomisë dhe të nxisë zhvillimin më të madh të marrëdhënieve ekonomike e tregtare dypalëshe.

Gjatë dialogut, të dy palët arritën një sërë rezultatesh dhe konsensusesh me dobi të ndërsjellë.

He, Champagne dhe Sidhu morën pjesë së bashku të dielën në një tryezë të rrumbullakët biznesi me liderë të industrisë nga të dy vendet për të diskutuar mundësitë për të zgjeruar tregtinë dhe investimet dypalëshe.