DURRËS — Gjykata e Durrësit ka vendosur të zhvillojë me dyer të mbyllura seancën gjyqësore ndaj 57-vjeçarit Nikoll Radaçi, i cili akuzohet për aksidentimin me pasojë vdekjen e tre fëmijëve të mitur.

Çështja ndaj 57-vjeçarit është dërguar zyrtarisht për gjykim nën akuzën e "Shkeljes së rregullave të qarkullimit rrugor". Ndërkohë, për akuzën e "Drejtimit të mjetit në mënyrë të parregullt" është kërkuar pushimi i hetimit për shkak të efektit të ligjit për amnistinë.

Aksidenti i rëndë u shënua më 3 maj në zonën e ish-Kënetës në Durrës, ku mjeti tip "Mercedes-Benz ML" i drejtuar nga Radaçi përplasi në trotuar tre fëmijët e moshave 8, 10 dhe 12 vjeç. Dy prej të miturve ndërruan jetë menjëherë në vendngjarje, ndërsa i treti u dërgua në gjendje kritike në spital. Nga verifikimet e kryera pas arrestimit, 57-vjeçari rezultoi se drejtonte mjetin në gjendje të dehur në nivelin 0.73 mg/l, ndërsa më parë i ishte pezulluar dy herë leja e drejtimit për të njëjtën shkelje.