PARIS — Kryeministri i Kosovës, Albin Kurti, i pranishëm në punimet e Forumit të Paqes në Paris, u ndal te drejtësia ndërkombëtare dhe proceset që po zhvillohen në Gjykatën Speciale në Hagë.

Në kuadër të një paneli diskutimi, Kurti u pyet nga të pranishmit lidhur me rolin që mund të luajë një qeveri kombëtare në lehtësimin e procedurave të drejtësisë penale ndërkombëtare, veçanërisht marrë parasysh zhvillimet e fundit dhe perceptimin e opinionit publik në Kosovë. Kryeministri u përgjigj shkurtimisht duke vënë theksin te rrugët ligjore të ankimimit.

"Nëse nuk jeni të kënaqur me aktgjykimin, bëni të gjitha përpjekjet e nevojshme për të paraqitur apel dhe mos ndaloni kurrë së besuari në të vërtetën dhe së punuari për drejtësi," u shpreh kryeministri Kurti gjatë fjalës së tij.