ELBASAN — Ministri i Brendshëm, Ervin Demo, së bashku me kryetarin e Bashkisë Elbasan, Gledian Llatja, zhvilluan sot një takim me banorët e pallatit të dëmtuar nga shpërthimi tragjik, ngjarje që i mori jetën 2 qytetarëve dhe la të plagosur 10 të tjerë.

Gjatë fjalës së tij, ministri Demo garantoi mbështetjen e plotë të strukturave shtetërore për përballimin e pasojave dhe strehimin e familjeve të prekuara.

"Jemi këtu për të parë nga afër situatën dhe për të koordinuar punën me pushtetin vendor. Si strukturat e qeverisë qendrore, ashtu edhe bashkia, janë të gjitha në gatishmëri të plotë për t’u ardhur në ndihmë familjarëve të prekur nga kjo fatkeqësi dhe për të siguruar një zgjidhje të qëndrueshme e afatgjatë për strehimin e tyre."

Lidhur me pyetjen mbi funksionimin e administratorëve të pallateve, kreu i Ministrisë së Brendshëm sqaroi se kuadri ligjor tashmë është konsoliduar dhe se bashkitë po punojnë për zbatimin e plotë të tij.

"Baza ligjore dhe aktet normative ekzistojnë prej kohësh. Në rregulloret përkatëse janë sanksionuar qartë të gjitha detyrimet, angazhimet dhe të drejtat e administratorëve të pallateve. Bashkitë po punojnë në këtë drejtim, por kuptohet se është një proces që kërkon kohën e vet për t’u zbatuar plotësisht në çdo banesë kolektive."

I pyetur mbi reagimin dhe kapacitetet e shërbimit zjarrfikës gjatë ndërhyrjes në vendngjarje, ministri Demo hodhi poshtë pretendimet e protestuesve, duke theksuar se infrastructures logjistike e emergjencave po përmirësohet me ritme të shpejta.

"Të gjitha bashkitë e vendit po forcojnë vit pas viti flotën dhe mjetet logjistike për përballimin e emergjencave civile. Në rastin e ngjarjes në Elbasan, trupat zjarrfikëse kanë bërë detyrën me profesionalizëm dhe përkushtim."

Nga ana e tij, kryetari i Bashkisë Elbasan, Gledian Llatja, pohoi se bashkia zotëron kapacitetet e nevojshme teknike dhe logjistike për përballimin e situatave të tilla emergjente, ndërsa njoftoi miratimin e ndihmës financiare për strehimin e banorëve.

"Bashkia Elbasan është ndër bashkitë me mjete më të mira dhe të kompletuara zjarrfikëse në vend. Sot kemi miratuar vendimin për bonusin e qirasë për të gjitha familjet e prekuara. Tashmë jemi në pritje të raportit përfundimtar të ekspertizës nga Instituti i Ndërtimit. Bonusi i qirasë përllogaritet mbi bazën e sipërfaqes së banesës dhe numrit të anëtarëve të familjes, duke mbuluar plotësisht nevojat sipas standardeve të emergjencave civile."

Aktualisht, banorët e prekur po plotësojnë dokumentacionin e kërkuar nga autoritetet me qëllim përfitimin e menjëhershëm nga skemat e mbështetjes financiare për bonusin e qirasë dhe kompensimin e dëmeve të shkaktuara në banesa.