KAMËZ — Shërbimet e Komisariatit të Policisë Nr. 5 në Tiranë kanë arrestuar në flagrancë shtetasin Zyber Bami, 42 vjeç, gjatë operacionit të koduar “Kontigjenti”.

Ndërhyrja e uniformave blu u organizua në afërsi të liqenit të Çekrezës, pas informacioneve të marra se një person me precedentë kriminalë lëvizte i armatosur në këtë zonë. Gjatë kontrollit fizik të ushtruar ndaj 42-vjeçarit, i cili më parë ka qenë i dënuar për armëmbajtje pa leje, policia i gjeti dhe i sekuestroi një pistoletë me mulli bashkë me municionin përkatës, si dhe një sasi lënde të dyshuar narkotike të llojit kokainë.

Materialet procedurale në ngarkim të të arrestuarit i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme hetimore.