TIRANË — Operatorët e transportit publik i janë drejtuar me një letër zyrtare Kuvendit dhe Ministrisë së Financave, ku paralajmërojnë se nga 1 janari do të kërkojnë rritjen e çmimit të biletës dhe abonesë nëse sektori nuk përfshihet në skemën e TVSH-së së reduktuar në 6%.

Shoqata Kombëtare e Transportit Qytetas argumenton se rritja e propozuar e TVSH-së standarde nga 20% në 21% do të ushtrojë presion të drejtpërdrejtë mbi kostot e shërbimit, nga i cili varen rreth 500 mijë qytetarë në ditë. Përmes kërkesës drejtuar Komisionit për Ekonominë, operatorët kërkojnë që transporti publik të trajtohet si produkt i shportës bazë, me qëllim që të shmanget rritja e tarifave që përcaktohen nga pushteti vendor.

Gjithashtu, shoqata propozon përjashtimin e autobusëve të licencuar nga taksa e re vjetore e qarkullimit, rimbursimin apo heqjen e akcizës për karburantin dhe gazin natyror (CNG/LNG), si dhe krijimin e skemave lehtësuese për kalimin te mjetet elektrike. Përfaqësuesit e sektorit i bëjnë thirrje institucioneve të zhvillojnë një seancë dëgjimore dhe një analizë të detajuar financiare për të garantuar qëndrueshmërinë e shërbimit publik.