Kryeqyteti është përfshirë sërish nga protestat mbrëmjen e kësaj të hëne, ku qytetarët janë mbledhur para godinës së Kryeministrisë në kuadër të protestës së 28-të të revoltës studentore dhe qytetare.

Tubimi është shoqëruar me tensione në terren, pasi rreth orës 19:45 janë regjistruar përplasje dhe debate të forta mes qytetarëve dhe efektivëve të Policisë së Shtetit. Shkak i pakënaqësisë është bërë vendosja e gjobave administrative ndaj personave të konstatuar apo të fotografuar gjatë tubimeve.

Disa qytetarë kanë denoncuar se efektivët e policisë u kanë kërkuar mjetet e identifikimit në rrugë, duke i ndëshkuar me gjoba nën pretendimin se kanë marrë pjesë në protesta, ndërsa situata vijon të mbetet e tensionuar në zonën përreth bulevardit kryesor.