PRISHTINË — Kandidati i Listës Studentore në Serbi, Fegja Dimoviq, ka përsëritur qëndrimin se Kosova është pjesë e Serbisë, pas një vizite dyditore që një delegacion i kësaj lëvizjeje zhvilloi më 7 dhe 8 nëntor.

Përmes një reagimi publik, Dimoviq theksoi se Kosova zë një vend qendror në programin politik të lëvizjes, duke e cilësuar atë si pjesë përbërëse të identitetit shpirtëror dhe kulturor serb. “Bashkëkombësve tanë në Kosovë u përcjellim një mesazh dashurie dhe solidariteti, me premtimin e qartë se nuk do t’i harrojmë kurrë”, deklaroi Dimoviq, duke shtuar se delegacioni kthehet me vendosmërinë për të luftuar krimin e organizuar dhe për të mbështetur komunitetin serb.

Delegacioni i përbërë nga gjashtë përfaqësues zhvilloi një takim me mitropolitin e Rashkës dhe Prizrenit, Teodosije, në Manastirin e Graçanicës, ku u diskutua për sfidat e komunitetit dhe Kishës Ortodokse Serbe. Sipas raportimeve, kandidatët nuk u takuan me përfaqësuesit politikë vendas. Ndërkohë, kandidati Jugosllav Gashiq deklaroi se Lista Studentore nuk do të bashkëpunojë me Listën Serbe, duke e bërë këtë të fundit përgjegjëse për përkeqësimin e pozitës së serbëve në Kosovë. Vizita vjen pas fitores së Listës Studentore në zgjedhjet parlamentare të 25 tetorit në Serbi.