TIRANË — Autoriteti Kombëtar për Sigurinë Kibernetike (AKSK) ka lëshuar një paralajmërim urgjent për qytetarët lidhur me një skemë mashtrimi përmes mesazheve SMS, ku keqpërdoret emri i Drejtorisë së Përgjithshme të Shërbimeve të Transportit Rrugor (DPSHTRR).

Sipas njoftimit zyrtar, mesazhet e rreme përmbajnë lidhje mashtruese ku qytetarëve u kërkohet të vendosin të dhënat e tyre personale ose bankare, duke u ushtruar presion me kërcënime për penalizime apo detyrime të papaguara rrugore. AKSK bën me dije se në bashkëpunim me institucionet përgjegjëse janë marrë masat për adresimin e rastit dhe monitorimin e tentativave të ngjashme.

Autoriteti u bën thirrje qytetarëve të mos klikojnë në linqet e dërguara, të mos ndajnë kode verifikimi apo të dhëna financiare, si dhe të verifikojnë çdo gjobë vetëm përmes kanaleve zyrtare. Gjithashtu rekomandohet bllokimi i menjëhershëm i numrave dërgues dhe raportimi i tyre. “Emri apo logoja e një institucioni nuk garantojnë vërtetësinë e mesazhit”, thekson AKSK, duke nëvizuar se presioni për të vepruar me ngut është tregues i pastër i një tentative mashtrimi.