TIRANË — Avokati i Erion Veliajt, Plarent Ndreca, i ka drejtuar një letër zyrtare Drejtorisë së Përgjithshme të Burgjeve, ku paralajmëron se gjendja shëndetësore e klientit të tij është kritike dhe mund të kërkojë ndërhyrje të menjëhershme kirurgjikale në këmbë.

Përmes shkresës, Ndreca denoncon vonesat burokratike dhe refuzimin e vënies në dispozicion të dokumentacionit mjekësor pas ekzaminimeve të kryera më 7 nëntor. “Konstatoj se përgjigjja juaj nuk i jep zgjidhje kërkesës konkrete për vënien në dispozicion të dokumentacionit mjekësor të krijuar nga institucioni juaj gjatë ekzaminimit të z. Erion Veliaj. Kërkesa ime ka të bëjë me dokumentacionin e klientit që përfaqësoj, për qëllime të drejtpërdrejta të mbrojtjes së shëndetit dhe interesave të tij ligjore”, shprehet Ndreca në letrën e tij.

Më tej, avokati thekson se aktet mjekësore dhe imazhet e radiologjisë kërkohen për konsultim urgjent me mjekë specialistë në Tiranë. “Sipas informacioneve të marra, gjendja shëndetësore e z. Veliaj mund të kërkojë ndërhyrje kirurgjikale. Çdo vonesë e mëtejshme e pajustifikuar në dhënien e dokumentacionit, nëse pengon trajtimin në kohë apo kontribuon në përkeqësimin e gjendjes shëndetësore të klientit tim, do të ngrejë çështjen e përgjegjësisë ligjore të institucionit dhe të zyrtarëve përgjegjës”, deklaroi Ndreca, duke ia përcjellë shkresën për dijeni edhe Ministrisë së Shëndetësisë.