TIRANË — Komisioni i Posaçëm i Kuvendit për Reformën Zgjedhore rinis punën pas disa muajve pezull, me fokus te rishikimi i formulës së përfaqësimit në Këshillat Bashkiakë pas ndarjes së re territoriale.

Mbledhja e parashikuar në orën 13:00 synon adresimin e rekomandimeve të OSBE/ODIHR dhe Komisionit Evropian për përfshirjen e të gjitha forcave politike në proces. Në tryezë, Partia Demokratike propozon aplikimin e listave 100% të hapura edhe për zgjedhjen e këshillave bashkiakë.

Nga ana tjetër, Partia Socialiste nuk ka paraqitur ende një propozim konkret për sistemin zgjedhor, por ka paralajmëruar se do të vijojë e vetme me miratimin e reformës nëse nuk arrihet një dakordësi. Komisioni përballet me afate të ngushta kohore, pasi mandati i tij përfundon në fund të muajit dhe mazhoranca ka bërë të ditur se nuk do të ketë shtyrje të mëtejshme.