TIRANË — Kryetari i Partisë Demokratike, Sali Berisha, ka akuzuar kryeministrin Edi Rama dhe familjarët e tij për përvetësimin e paligjshëm të 221 mijë metrave katrorë tokë publike në zonën e Kanionit të Gjipesë për ndërtimin e një hoteli.

Në një deklaratë për mediat, Berisha pretendoi se sipërfaqja e tokës ka qenë gjithmonë pronë publike dhe se nuk ekziston asnjë dokumentacion kadastral apo arkivor që të provojë pronësinë private mbi të. “Aty nxin me të gjithë shëmtinë e tij ndërtimi i hotelit ‘Edi Rama’ në Kanionin e Gjipesë, kanion që në shekuj ka qenë pronë publike. Nuk dispononte asnjë dokument kadastral. As të Perandorisë, të Mbretërisë, as të diktaturës”, u shpreh kreu i PD-së, duke përmendur gjithashtu vëllain e kryeministrit, Olsi Rama.

Gjatë konferencës, Berisha u ndal edhe te njoftimi i Prokurorisë së Posaçme për nisjen e hetimeve mbi dosjen “Albanian Files”. Kreu i demokratëve u shpreh krejtësisht skeptik lidhur me mundësinë e hetimit dhe penalizimit të kryeministrit nga organet e drejtësisë.

“Të mendosh se SPAK-u apo të besosh se SPAK-u do të penalizojë Edi Ramën është njëlloj sikur të mendosh se veshin tënd mund ta shohësh pa pasqyrë”, deklaroi Berisha.