TIRANË — Miratimi i hartës së re territoriale ka nxjerrë në pah pikëpyetje mbi administrimin e fondeve publike, ndërsa projektbuxheti i vitit 2027 vijon të shpërndajë financime sipas ndarjes së vjetër administrative.

Në total, pushteti vendor parashikohet të administrojë 114.6 miliardë lekë, nga të cilat 58.6 miliardë sigurohen nga të ardhurat e vetë njësive dhe 56 miliardë nga buxheti i shtetit. Pjesë e këtij alokimi janë rreth 6 miliardë lekë të parashikuara për 15 bashki që do të humbasin statusin e tyre si njësi administrative më vete, mes të cilave Maliqi me 797 milionë lekë, Divjaka me 575 milionë, Përrenjasi me 486 milionë dhe Cërriku me 452 milionë lekë.

Alokimi i fondeve synon të garantojë vazhdimësinë e shërbimeve publike deri në ekzekutimin e plotë të reformës. Megjithatë, ekspertët ngrenë shqetësime lidhur me menaxhimin e parave, transferimin e kontratave shumëvjeçare, tenderët e hapur dhe mbulimin e detyrimeve financiare ndaj operatorëve privatë gjatë fazës tranzitore te bashkitë pritëse.

Ministri i Brendshëm, Ervin Demo, e ka cilësuar vitin 2027 si periudhë tranzicioni për pushtetin vendor, duke nëvizuar nevojën për koordinim administrativ. Ndërkohë, mbetet për t’u përcaktuar kuadri ligjor dhe mekanizmat konkretë për kontrollin e shpenzimeve dhe kryerjen e bilanceve përfundimtare financiare përpara shkrirjes zyrtare të këtyre njësive.