TIRANË — Strukturat hetimore të Policisë së Tiranës kanë finalizuar me sukses operacionin e koduar “Gjuetari i Bankave”, duke bërë të mundur zbardhjen e dy vjedhjeve me armë zjarri të kryera në filiale bankare të nivelit të dytë.

Në pranga ka rënë shtetasi Robert Duka (alias Albert Duka), 50 vjeç, i dyshuar si autor i grabitjeve të datës 2 qershor 2026 dhe 2 nëntor 2026. Identifikimi i tij u arrit falë përdorimit të sistemeve teknologjike për identifikimin e personave të maskuar dhe analizimit të veshjeve të përdorura gjatë ngjarjeve.

Gjatë kontrolleve, shërbimet e policisë sekuestruan në cilësinë e provës materiale 8.200 euro, veshje të përdorura gjatë kryerjes së veprave penale dhe dy aparate celulare, ndërsa hetimet vijojnë për dokumentimin e plotë të ngjarjeve.

Njoftimi i policisë:

Si rezultat i hetimeve të thelluara, të kryera me metoda speciale, nga strukturat hetimore, nën drejtimin e Prokurorisë, u finalizua operacioni policor i koduar “Gjuetari i Bankave”.

Në kuadër të këtij operacioni u identifikua dhe u ndalua shtetasi R. D., alias A. D., 50 vjeç, i dyshuar si autor i dy vjedhjeve nën kërcënimin e armës së zjarrit, të kryera më datë 02.06.2026 dhe 02.11.2026, në dy filiale bankare në Tiranë. Identifikimi i tij u arrit falë punës profesionale hetimore, përdorimit të sistemeve teknologjike për identifikimin e personave pavarësisht maskimit, si dhe analizimit të veshjeve të përdorura gjatë vjedhjeve.

Gjatë kontrolleve u sekuestruan ; – 8 200 euro, – Veshje të përdorura gjatë kryerjes së veprave penale – 2 aparate celularë. Hetimet vijojnë për dokumentimin e plotë të këtyre ngjarjeve.