TIRANË — Në foto është personi i dyshuar për grabitjen e 60 mijë eurove nga një bankë e nivelit të dytë në zonën e Komunës së Parisit në Tiranë. Ai është identifikuar si Robert Duka, 50 vjeç, me origjinë nga Vlora.

Ngjarja ndodhi të hënën e javës së kaluar, kur 50-vjeçari hyri në ambientet e bankës i armatosur dhe i maskuar. Fillimisht ai kërcënoi rojen e sigurisë dhe më pas arkëtaren, e cila nën trysninë e armës i dorëzoi shumën e parave.

Pas kryerjes së grabitjes, Duka u largua nga vendngjarja me një skuter elektrik për të shmangur pikasjen. Pamjet e kamerave të sigurisë kanë dokumentuar lëvizjet e tij gjatë largimit, duke i mundësuar hetuesve zbardhjen e dinamikës së ngjarjes dhe identifikimin e autorit.

Njoftimi:

Si rezultat i hetimeve të thelluara, të kryera me metoda speciale, nga strukturat hetimore, nën drejtimin e Prokurorisë, u finalizua operacioni policor i koduar “Gjuetari i Bankave”.

Në kuadër të këtij operacioni u identifikua dhe u ndalua shtetasi R. D., alias A. D., 50 vjeç, i dyshuar si autor i dy vjedhjeve nën kërcënimin e armës së zjarrit, të kryera më datë 02.06.2026 dhe 02.11.2026, në dy filiale bankare në Tiranë. Identifikimi i tij u arrit falë punës profesionale hetimore, përdorimit të sistemeve teknologjike për identifikimin e personave pavarësisht maskimit, si dhe analizimit të veshjeve të përdorura gjatë vjedhjeve.

Gjatë kontrolleve u sekuestruan ; – 8 200 euro, – Veshje të përdorura gjatë kryerjes së veprave penale – 2 aparate celularë. Hetimet vijojnë për dokumentimin e plotë të këtyre ngjarjeve.