Inteligjenca artificiale pritet të luajë një rol kyç në diagnostikimin e hershëm mjekësor, falë një projekti të ri që synon të identifikojë shenjat e diabetit dhe sëmundjeve kardiovaskulare përmes kontrolleve rutinë të syve.

Iniciativa po zhvillohet nga qendra Northern Ophthalmic Research and Innovation (NORI) në Universitetin e Sunderlandit, e cila ka siguruar një financim prej 12.2 milionë paundësh nga qeveria britanike përmes organizatës UK Research and Innovation (UKRI).

Teknologjia e re do të analizojë skanimet e syve duke i krahasuar ato me të dhënat shëndetësore të pacientëve dhe informacionet e mbledhura nga komuniteti. Qëllimi është evidentimi i ndryshimeve mikroskopike në enët e gjakut dhe indet nervore në pjesën e pasme të syrit, të cilat shërbejnë si sinjale të hershme të sëmundjeve përpara se të shfaqen simptomat e para.

Në fazat e para, projekti do të përqendrohet te diabeti dhe sëmundjet kardiovaskulare, ndërsa në të ardhmen studiuesit synojnë zgjerimin e përdorimit të teknologjisë edhe për identifikimin e demencës dhe goditjeve në tru.

Bashkëdrejtori i NORI-t, Matthew Campbell, bëri të ditur se fondet do të përdoren për zhvillimin, testimin në kushte reale dhe zgjerimin ndërkombëtar të kësaj teknologjie. Nga ana e tij, ministri britanik i Shkencës, Chris McDonald, theksoi rëndësinë e diagnostikimit të hershëm për përmirësimin e shëndetit të pacientëve dhe lehtësimin e ngarkesës në sistemin shëndetësor publik, NHS.