Debati i nisur në distancë mes këngëtareve Jonida Maliqi dhe Rozana Radi ka marrë një tjetër rrjedhë pas përfshirjes së ish-banorit të Big Brother VIP Albania, Rogert Sterkaj, i cili ka dalë hapur në mbështetje të Maliqit.

Konflikti nisi pasi Jonida Maliqi, e ftuar në emisionin “Goca dhe Gra”, e cilësoi Rozana Radin si një artiste të mbivlerësuar në aspektin vokal, pavarësisht se e vlerësoi atë si poete dhe aktore. Kësaj deklarate Rozana Radi iu përgjigj me ironi në rrjetet sociale, duke u shprehur: “Sikur një këngë e jotja të merrte aq klikime sa një video ku përmendem unë, do të ishte film! Suksese!”.

Situata u tensionua më tej kur Rogert Sterkaj bëri një reagim të ashpër në rrjetet sociale në mbrojtje të Maliqit, duke vënë në pikëpyetje suksesin muzikor të Radit dhe duke përmendur në mënyrë thumbuese edhe emrin e kompozitorit Adi Hila. Kjo deklaratë ka tërhequr vëmendjen e mediave rozë, duke e lidhur debatin edhe me diskutimet e fundit publike rreth materialeve private të përfolura në rrjet.

Për sa i përket këtij zhvillimi, Rozana Radi nuk ka dhënë ende një përgjigje publike ndaj postimit të Sterkajt.