Pavarësisht protestave të ashpra me molotovë dhe tensioneve në kryeqytet, Partia Socialiste dhe Partia Demokratike pritet të ulen sërish së bashku në tryezën e Komisionit të Posaçëm Parlamentar të Reformës Zgjedhore, i cili rimblidhet të hënën pas disa muajsh ndërprerjeje.

Sipas burimeve nga selia blu, agjenda e mbledhjes vjen e imponuar nga socialistët dhe synon plotësimin e kuadrit ligjor për zgjedhjet vendore, pas miratimit të ndarjes së re territoriale që e ndan vendin në 46 bashki. Në rend dite janë parashikuar diskutimi i detyrimeve që rrjedhin nga legjislacioni për vetëqeverisjen vendore, si dhe shqyrtimi i detyrave për projektligjin “Për financimin e partive politike” dhe çështjeve të tjera të mbetura, ndërkohë që mandati i komisionit përfundon në fund të muajit nëntor.

Bashkëkryetari i komisionit nga radhët e PD-së, Oerd Bylykbashi, ka kërkuar që puna të fokusohet te zbatimi i rekomandimeve të OSBE/ODIHR dhe te garantimi i ndarjes së shtetit nga partia në pushtet. Sakaq, palët paraqiten me qëndrime të ndryshme: Partia Demokratike kërkon lista 100% të hapura edhe për Këshillat Bashkiakë, ndërsa socialistët shprehen të hapur për diskutimin e sistemit me kushtin që në paketën e ndryshimeve kushtetuese të përfshihet edhe ulja e numrit të deputetëve nga 140 në 101. Komisioni vazhdon të bashkëdrejtohet nga Oerd Bylykbashi (PD) dhe Damian Gjiknuri (PS).