Presidenti i Shteteve të Bashkuara, Donald Trump, ka lëshuar kritika të ashpra lidhur me rezultatin e zgjedhjeve të mesit të mandatit, duke deklaruar përmes një postimi në platformën Truth Social se vendi ka bërë “një hap të madh prapa në histori”.

Në mesazhin e tij, Trump ka lidhur zhvillimet politike me situatën ekonomike dhe lëvizjet në tregjet financiare, duke përmendur se Wall Street regjistroi humbje prej 3 trilionë dollarësh brenda një dite të vetme. Ai e krahasoi këtë situatë me ecurinë e bursave gjatë mandatit të tij të mëparshëm, të cilën e cilësoi si një rritje të jashtëzakonshme.

Pavarësisht pakënaqësisë së shprehur për rezultatet zgjedhore dhe pasojat e pretenduara ekonomike, kreu i Shtëpisë së Bardhë është treguar optimist për të ardhmen, duke u bërë thirrje mbështetësve të mos frikësohen dhe duke u zotuar se vendi do të rikthehet më i fortë se kurrë.