Policia e Vlorës ka finalizuar operacionin e koduar “Yacht”, duke bërë të mundur parandalimin e një ngjarjeje të mundshme kriminale dhe arrestimin në flagrancë të një 34-vjeçari, pasi u përfshi në një konflikt dhe tentoi të përdorë armën e zjarrit.

Sipas njoftimit zyrtar, ngjarja ka regjistruar mbrëmjen e djeshme, rreth orës 20:50, në lagjen “Uji i Ftohtë”, në vendin e quajtur “Rrapi”, ku shërbimet e Policisë konstatuan një konflikt për motive të dobëta mes shtetasit Mario Meçani 34 vjeç, dhe E. H., 41 vjeç, banues në Tiranë.

Ndërhyrja e menjëhershme e efektivëve ka bërë të mundur neutralizimin e situatës.

Gjatë tentativës për t’u larguar me vrap, 34-vjeçari është kapur nga policia, ndërsa gjatë verifikimeve rezultoi se gjatë konfliktit ai kishte tentuar të përdorte një armë zjarri pistoletë, të cilën e kishte hedhur në rërë në vendin e kapjes.

Arma dhe një përforcues metalik grushti i gjetur në automjetin e tij u sekuestruan në cilësinë e provës materiale.

Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme ligjore.