Kombëtarja e Kosovës në hendboll do të zhvillojë sot ndeshjen e dytë në kuadër të fazës kualifikuese për Kampionatin Evropian 2028, ku do të përballet me kombëtaren e Hungarisë.

Takimi është planifikuar të luhet në palestrën “Bill Clinton” në Ferizaj, duke nisur nga ora 17:15. Përfaqësuesja e Kosovës kërkon kthesën dhe fitoren e parë në grup, pasi në ndeshjen hapëse u mposht nga Ishujt Faroe me rezultatin 37:30.

Në krahun tjetër, Hungaria vjen në këtë sfidë pas një nisjeje të suksesshme, ku mposhti Malin e Zi me shifrat 32:21, duke kryesuar Grupin 4. Trajneri i Kosovës, Jesper Östlund, ka vlerësuar vështirësinë e përballjes ndaj një kundërshtari me përvojë ndërkombëtare dhe me lojtarë që aktivizohen në klubet më të mëdha evropiane, por theksoi se mbështetja e zjarrtë e tifozëve në Ferizaj do të jetë një mbështetje e madhe për ekipin.

Në Grupin 4 garojnë Kosova, Hungaria, Ishujt Faroe dhe Mali i Zi, ndërsa dy vendet e para të çdo grupi kualifikohen direkt në finalet e “Euro 2028”, së bashku me katër skuadrat më të mira të vendit të tretë.