Kreu i Partisë Demokratike, Sali Berisha, ka ashpërsuar tonet ndaj qeverisë lidhur me situatën në tregun e pasurive të paluajtshme, duke deklaruar se çmimet e apartamenteve në vend kanë arritur nivele të papërballueshme deri në 4 mijë euro për metër katror.

Gjatë deklaratës së tij, Berisha ka akuzuar ekzekutivin se ka lejuar që sektori i ndërtimit, kullave dhe resorteve turistike të shndërrohet në mekanizmin kryesor për pastrimin e parave të krimit dhe trafikut të lëndëve narkotike. Sipas tij, hyrja e kapitaleve informale ka shkatërruar konkurrencën dhe ka bërë që qytetarët e zakonshëm të mos kenë mundësi të blejnë një banesë.

Kreu i PD-së solli raste konkrete se si apartamentet shiten me çmime stratosferike ose mbahen qëllimisht bosh vetëm për të siguruar ruajtjen e vlerës së parave të fituara në rrugë të paligjshme, duke theksuar se ky model ekonomik dëmton rëndë familjet shqiptare dhe e largon tregun e banesave nga realiteti ekonomik i vendit.