Egjipti ka njoftuar zbulimin e një rezervuari të ri të gazit natyror në Detin Mesdhe, me vlerësime paraprake që flasin për rreth 200 miliardë metra kub gaz. Zbulimi është bërë në pusin eksplorues “Nasim-1X”, në zonën e koncesionit Taiba.

Lajmi u bë i ditur nga Ministria egjiptiane e Naftës dhe Burimeve Minerale, e cila konfirmoi se punimet e shpimit dhe vlerësimit kanë identifikuar një shtresë që përmban gaz, me trashësi neto rreth 15 metra.

Sipas ministrisë, shtresa e zbuluar paraqet karakteristika të dallueshme gjeologjike dhe petrofizike, ndërsa studimet teknike dhe analizat e rezervuarit janë ende në zhvillim.

Ekspertët po punojnë për të përcaktuar sasinë e gazit që mund të nxirret, kapacitetin e mundshëm të prodhimit ditor dhe nëse zbulimi është ekonomikisht i leverdishëm për shfrytëzim.

Vlera e tregut e kësaj sasie arrin në rreth 183 miliardë euro duke marrë  si referencë çmimin aktual evropian TTF, rreth 86.9 €/MWh.

Kajro shpreson që ky zbulim të kontribuojë në rritjen e prodhimit vendas të gazit natyror dhe të reduktojë varësinë e vendit nga importet, në një kohë kur sigurimi i furnizimit me energji mbetet një çështje e rëndësishme për ekonominë egjiptiane.

Megjithatë, autoritetet nuk kanë bërë ende të ditur se kur mund të nisë prodhimi, pasi fillimisht duhet të përfundojnë studimet përfundimtare mbi rezervat dhe qëndrueshmërinë tregtare të projektit.