Autoritetet polake kanë zbardhur detaje tronditëse rreth ngjarjes së rëndë që tronditi vendin, duke identifikuar 24-vjeçarin Michal Oksinski si autorin e sulmit të përgjakshëm në Krakov, ku humbën jetën nëntë persona në total, përfshirë tre anëtarë të familjes së tij.

Sipas hetimeve paraprake, Oksinski fillimisht ekzekutoi në gjumë babanë 53-vjeçar, nënën 52-vjeçare dhe motrën e tij 21-vjeçare — studente në Akademinë e Arteve të Bukura "Jan Matejko", e cila ishte kthyer për fundjavë në shtëpi — në banesën e familjes në qytetin Ostrowiec Świętokrzyski. Gjatë kontrollit në apartament, policia gjeti shtatë armë zjarri, ndërsa autori rezultonte të kishte pasur leje armëmbajtjeje dhe të ishte i apasionuar pas qitjes sportive.

Pas krimit në familje, 24-vjeçari u nis drejt Krakovit me makinën e të atit dhe, pak pas orës 15:00 të së shtunës, hyri me automjet në sheshin qendror Rynek Główny, ku qëlloi pa dallim ndaj kalimtarëve. Nga të shtënat në shesh u vranë gjashtë persona dhe u plagosën dhjetëra të tjerë, përfshirë dy efektivë policie. Autori u neutralizua dhe u arrestua nga forcat e rendit brenda tre minutash nga nisja e sulmit, pasi u plagos gjatë një shkëmbimi zjarri.

Ndërkohë, ministri i Brendshëm, Marcin Kierwiński, ka bërë të ditur se autoritetet po hetojnë mundësinë e ndikimit të ideologjive të ekstremit të djathtë dhe ultranacionaliste te 24-vjeçari, ndërsa vijojnë verifikimet për të zbardhur motivet e sakta të kësaj tragjedie të paprecedentë.