ZYRIH — Imami me origjinë shqiptare Bashkim Aliu është detyruar të largohet nga të gjitha funksionet e tij publike në Zvicër, pas një hulumtimi të publikuar nga gazeta SonntagsZeitung që zbardhi deklarata homofobe dhe kontakte me qarqe radikale islamike.

Aliu mbante detyrën e drejtuesit të Komisionit të Imamëve pranë Federatës së Organizatave Islamike në Zvicër (FIDS) dhe shërbente si autoriteti më i lartë teologjik i Bashkimit të Organizatave Islamike në Zyrih (VIOZ). Pas publikimit të gjetjeve, FIDS e shkarkoi menjëherë nga detyra, ndërsa vetë imami dha dorëheqjen nga të gjitha postet brenda strukturave të VIOZ-it.

Deklaratat dhe pjesëmarrja në konferencën me liderin e Hamasit

Hulumtimi i medias zvicerane zbuloi qëndrime kontroverse të Aliut, përfshirë një reagim publik të vitit 2017 ku ai e cilësonte paradën "Pride" në Prishtinë si "paradë të turpit". Organizatat FIDS dhe VIOZ u distancuan prerazi nga këto deklarata, duke nëvizuar se qëndrimet që cenojnë dinjitetin njerëzor bien ndesh me ligjet zvicerane.

Elementi më i rëndë i hetimit ndërlidhet me udhëtimin e Aliut në Doha të Katarit në janar të vitit 2024, ku ai mori pjesë në Asamblenë e Përgjithshme të Bashkimit Ndërkombëtar të Dijetarëve Myslimanë. Në këtë veprimtari mbajti fjalim edhe ish-shefi i krahut politik të Hamasit, Ismail Hanije.

Drejtuesit e organizatave islamike në Zvicër deklaruan se nuk kishin dijeni për udhëtimin e tij. Çështja ka marrë përmasa të mëdha politike edhe për shkak të fondeve publike, pasi kantoni i Zyrihut i ka kaluar VIOZ-it rreth 2,5 milionë franga për projektin e kujdesit shpirtëror islamik në institucionet publike, përveç një mbështetjeje vjetore prej 50 mijë frangash nga vetë qyteti.