TIRANË — Katër persona janë arrestuar dhe 7 të tjerë janë proceduar penalisht pas protestës së zhvilluar të shtunën në kryeqytet, ku u shënuan përplasje me forcat e rendit, hedhje sendesh të forta, lëndësh piroteknike si dhe djegie të kazanëve të mbeturinave.

Sipas njoftimit zyrtar të Policisë së Shtetit, në vijim të veprimeve hetimore të kryera nën drejtimin e Prokurorisë, u bë ndalimi i shtetasve K. N., 24 vjeç, M. K., 19 vjeç, B. M., 19 vjeç, dhe Z. N., 34 vjeç. Gjatë kontrollit fizik dhe kontrollit të banesës, shtetasit K. N. iu gjetën një sasi lënde narkotike kanabis, një send metalik shpues, një send imitues i armës së zjarrit dhe 50 sfera metalike.

Gjithashtu, në zbatim të Aktit Normativ, policia ka vendosur 12 masa administrative, mes të cilave një gjobë prej 500.000 lekësh ndaj një protestuesi të maskuar, i cili goditi me gurë efektivët e policisë dhe godinën e Kryeministrisë. Grupi hetimor vijon punën për identifikimin e personave të tjerë të përfshirë në aktet e dhunës dhe bllokimin e qarkullimit.