EGJIPT – Një vendim surprizë ka ardhur nga Federata Egjiptiane e Futbollit, e cila ka shkarkuar Hossam Hassan nga posti i trajnerit të kombëtares. Në vend të tij është emëruar Ali Maher, aktualisht në krye të Ceramica Cleopatra, skuadër që militon në elitën e futbollit egjiptian.

Federata konfirmoi se Maher do të drejtojë “Faraonët” në dy ndeshjet e ardhshme kundër Malavit, të programuara për 13 dhe 17 nëntor, në kuadër të kualifikueseve të Kupës së Kombeve të Afrikës 2027.

Hassanit iu komunikua largimi vetëm pak ditë para nisjes së grumbullimit, ndërsa EFA e falënderoi për kontributin dhe rezultatet e arritura gjatë periudhës në drejtimin e skuadrës.

Trajneri i ri, 52-vjeçari Ali Maher, vjen pas një eksperience pozitive me Ceramica Cleopatra, me të cilën fitoi Kupën e Ligës Egjiptiane në sezonin 2024/25 dhe siguroi vendin e katërt në kampionatin vendas sezonin e kaluar.

Grumbullimi i Egjiptit do të nisë më 9 nëntor, ndërsa lista e lojtarëve pritet të publikohet në orët në vijim.

Vendimi është edhe më befasues duke pasur parasysh se Egjipti kryeson Grupin B të kualifikueseve me katër pikë, pas barazimit 0-0 me Angolën dhe fitores së thellë 5-0 ndaj Sudanit të Jugut.

Pavarësisht rezultateve dhe përfshirjes së tij në listën e ngushtë për çmimet CAF 2026, Hossam Hassan nuk do të jetë më në stolin e kombëtares.