Kryeministri Edi Rama ka njoftuar përmes një postimi në rrjetet sociale krijimin e një hapësire të re komunikimi digjitale të quajtur “Fol me Kryeministrin”, e cila synon të shërbejë si një kanal i drejtpërdrejtë ndërveprimi mes kreut të qeverisë dhe qytetarëve.

Sipas njoftimit, kjo nismë adresohet në radhë të parë për studentët dhe protestuesit, por mbetet e hapur për çdo qytetar që dëshiron të përcjellë qëndrimet e tij. Platforma është e ndarë në katër kategori kryesore — “Pyetje”, “Kritikë”, “Shqetësime” dhe “Propozime” — përmes të cilave të interesuarit mund të drejtojnë mesazhet dhe kërkesat e tyre drejtpërdrejt nëpërmjet funksionit të dedikuar të shkrimit.