Rripa i Gazës është përfshirë nga një situatë e rëndë humanitare pas shirave të rrëmbyeshëm që goditën enklavën gjatë ditës së djeshme, duke shkaktuar përmbytje masive në kampet e personave të zhvendosur.

Sipas raportimeve nga terreni, rreth 70 mijë tenda ku strehoheshin familjet e zhvendosura u përmbytën që në ditën e parë të motit të keq, ndërsa uji dhe balta dëmtuan sendet personale të banorëve, duke i lënë mijëra prej tyre pa strehë. Situata u rëndua më tej nga shembja e mureve dhe çative të dëmtuara më parë nga luftimet, duke lënë pas persona të plagosur, disa prej tyre në gjendje të rëndë.

Ekipet e Mbrojtjes Civile morën mbi 1,500 thirrje për ndihmë gjatë natës, ndërsa qindra familje u detyruan të braktisnin kampet e përmbytura. Autoritetet lokale dhe organizatat ndërkombëtare kanë paralajmëruar për rrezikun e lartë të përhapjes së sëmundjeve për shkak të përzierjes së ujërave të shiut me ujërat e ndotura, duke bërë thirrje për ndihmë urgjente për të garantuar strehim dhe kushte minimale higjienike.