Evropa po përballet gjatë këtij fillimi nëntori me një valë anormale dhe të paprecedentë alarmesh të rreme për bomba në fluturimet ndërkombëtare, duke vënë në lëvizje autoritetet e sigurisë, aviacionin civil dhe forcat ajrore të disa shteteve.

Sipas të dhënave të deritanishme, nga 1 deri mbrëmë, alarmet kanë përfshirë të paktën 45 deri në 50 fluturime dhe rreth 8 mijë pasagjerë.

Megjithëse asnjë prej kërcënimeve të mbërritura përmes emaileve anonime apo telefonatave nuk ka rezultuar real, frekuenca e tyre ka shqetësuar thellësisht ekspertët dhe drejtuesit e kompanive kryesore ajrore.

Pikërisht fakti se nuk ekziston një shënjestër e vetme e dallueshme – pasi incidentet nuk janë përqendruar te ndonjë kompani, aeroport apo shtet i caktuar – i ka shtyrë ekspertët e sigurisë, përfshirë ata të "Osprey Flight Solutions", të dyshojnë se bëhet fjalë për një operacion të vetëm dhe të koordinuar nga një qendër e përbashkët.

Ndër hipotezat kryesore të ngritura mbi motivet e kësaj fushate përfshihen pretendimet politike, fushatat e organizuara nga aktivistë, veprimtaria kriminale, si dhe opsioni i operacioneve hibride të lidhura me aktorë shtetërorë, ku kjo e fundit po vlerësohet si ndër më të mundshmet.

Procedurat e ndjekura në raste të tilla kërkojnë mobilizim të menjëhershëm: pas njoftimit të autoriteteve, shpesh urdhërohet ngritja e menjëhershme e avionëve luftarakë nën procedurën "scramble" për të shoqëruar dhe mbikëqyrur vizualisht mjetin fluturues derisa ai të ulet në një zonë të izoluar të aeroportit për kontrolle të imtësishme nga ekspertët e eksplozivëve.

Këto masa shoqërohen me kosto të konsiderueshme financiare. Vetëm devijimi i një fluturimi me distancë të shkurtër i kushton një kompanie ajrore mes 55 dhe 75 mijë euro, ndërsa fluturimet e gjata shkojnë deri në 150 mijë euro. Ndërkohë, ndërhyrja e avionëve luftarakë (siç është Eurofighter, me një kosto prej rreth 75 mijë eurosh për orë fluturimi) mbulohet plotësisht nga buxhetet publike dhe taksapaguesit.

Drejtuesi i grupit "Air France-KLM", Ben Smith, ka theksuar se nuk kishte parë kurrë më parë kërcënime të raportuara në një mënyrë kaq të organizuar, duke shprehur frikën se fushata mund të dekurajojë udhëtarët. Nga ana juridike, kompanitë ajrore nuk janë të detyruara t’i dëmshpërblejnë pasagjerët për devijimet e shkaktuara, pasi kërcënimet për bombë klasifikohen si rrethana të jashtëzakonshme jashtë kontrollit të tyre. Megjithatë, shqetësimi më i madh i ekspertëve për të ardhmen mbetet rreziku i rënies së vigjilencës, ku mbipopullimi i situatave me alarme të rreme mund të krijojë terrenin e përshtatshëm për individë me qëllime vërtet kriminale.