Tiranë, 7 nëntor 2026 – Ambasadori i ri i Izraelit në Shqipëri, Ohad Nakash Kaynar, ka nisur zyrtarisht detyrën diplomatike në Tiranë, pas dorëzimit të letrave kredenciale te Presidenti i Republikës, Bajram Begaj.

Në një mesazh të publikuar në platformën X, diplomati e cilësoi marrjen e detyrës si një moment të rëndësishëm dhe shprehu angazhimin për forcimin e marrëdhënieve mes Shqipërisë dhe Izraelit.

Kaynar vlerësoi se të dy vendet, pavarësisht madhësisë së tyre, kanë shoqëri të larmishme dhe histori të pasura, çka krijon mundësi për zgjerimin e bashkëpunimit në fusha të ndryshme strategjike.

Ndër sektorët ku synon të nxisë bashkëpunimin, ambasadori përmendi teknologjinë, industrinë, kërkimin shkencor dhe zhvillimin. Ai u shpreh se gjatë mandatit të tij do të punojë për të shfrytëzuar këto mundësi, duke garantuar transparencë dhe trajtim të drejtë në veprimtarinë e ambasadës.

Një vëmendje të veçantë në mesazhin e tij, Kaynar i kushtoi besimit mes dy popujve, të cilin e konsideroi thelbësor për zhvillimin e marrëdhënieve ekonomike dhe krijimin e mundësive për investime e vende të reja pune.

“Besimi mes izraelitëve dhe shqiptarëve është thelbësor për krijimin e mundësive të biznesit, vendeve të punës dhe investimeve”, shkroi ai.

Ambasadori paralajmëroi se ky besim mund të dëmtohet nga teoritë konspirative dhe narrativat e rreme, duke deklaruar se ai dhe Ambasada e Izraelit do të angazhohen për t’i kundërshtuar ato.

“Është e lehtë të shkatërrohet ky besim përmes teorive konspirative dhe narrativave të rreme; megjithatë, unë dhe Ambasada do të përpiqemi t’i hedhim poshtë ato, duke siguruar që e vërteta dhe besimi të mbizotërojnë”, theksoi Kaynar.

Në përfundim të mesazhit, diplomati u shpreh i gatshëm për të nisur punën në funksion të forcimit të marrëdhënieve miqësore dhe bashkëpunimit mes Shqipërisë dhe Izraelit.