ROMË — Inteligjenca artificiale po transformon rrënjësisht mënyrën se si konsumatorët kërkojnë, zgjedhin dhe blejnë produkte online, duke shkuar deri atje sa të parashikojë dëshirat e blerësve ende pa i shprehur ato vetë. Përmes përpunimit të miliona veprimeve ditore, algoritmet po përpiqen të zbërthejnë sjelljen njerëzore në internet.

Sipas një analize të gazetes italiane Il Sole 24 Ore, platforma ndërkombëtare e modës Lyst — e cila ndërthur ofertat e 27 mijë markave — përpunon rreth 10 milionë veprime në ditë, si kërkimet, produktet e ruajtura në listat e dëshirave dhe blerjet. Drejtoresha ekzekutive e Lyst, Emma McFerran, shpjegon se teknologjia synon të kapë të ashtuquajturat “kritere të heshtura”, pra faktorët ndikues që përdoruesit nuk i përmendin gjatë kërkimit, si nevoja për rehati, elegancë apo përshtatje me mjedisin shoqëror.

Pavarësisht fuqisë së algoritmeve për të kuptuar kontekstin, teknologjia ende shfaq kufizime, siç është vështirësia në identifikimin e preferencave negative kur një përdorues nuk e pëlqen një produkt pa lënë gjurmë të dukshme. Ndërkohë, një ndryshim i ndjeshëm vërehet te konsumatorët, veçanërisht te brezi Z, të cilët orientohen më shumë drejt stileve dhe kombinimeve estetike sesa te një markë e caktuar, ndërsa ngjarjet kulturore e sportive — si rasti i kapelës së New York Knicks me një rritje kërkimesh prej 4.276% në tremujorin e dytë të 2026 — dëshmojnë ndikimin e fuqishëm të kulturës popullore në tendencat e tregut.