BEOGRAD — Pas humbjes në zgjedhje përballë studentëve, ish-presidenti serb Aleksandër Vuçiç është shfaqur duke kënduar këngën “Vidovdan”, një prej simboleve kryesore të nacionalizmit serb. Ngjarja ka ndodhur gjatë një takimi me mbështetësit e tij në veri të Serbisë, ku Kosova ka qenë sërish në qendër të mesazhit politik.

Aktiviteti është zhvilluar mbrëmjen e së premtes në qytetin e Sremska Mitrovicës, në rajonin e Vojvodinës. Gjatë këtij takimi, Vuçiç iu bashkua anëtarëve dhe mbështetësve të Partisë Përparimtare Serbe (SNS) në interpretimin e këngës, ndërsa ish-kryeministrja Ana Bërnabiç shihej duke e përqafuar.

Duke përcjellë mesazhe që kanë shoqëruar për dekada politikën nacionaliste, ish-presidenti serb ka kënduar vargjet: “Kudo që shkoj, te ti kthehem sërish; askush s’mund të ma heqë Kosovën nga shpirti”.

Kënga “Vidovdan”, e krijuar në vitin 1989 dhe e interpretuar nga Gordana Lazareviç, lidhet ngushtë me kujtesën historike serbe për Betejën e Kosovës të vitit 1389. Kjo këngë u shndërrua në simbol të fuqishëm të nacionalizmit në të njëjtën periudhë kur Sllobodan Millosheviçi përdorte mitin e Kosovës për të nxitur dhe mobilizuar mbështetjen politike.