ATHINË — Një ngjarje e rëndë ka tronditur mbrëmjen e djeshme zonën e Kolonos në Athinë, ku mbeti i plagosur rëndë me armë zjarri 38-vjeçari shqiptar Helis Çato, banues në lagjen nr. 1 të Sarandës.

Atentati ndodhi pranë një kishe, ku autorët dyshohet se kanë hapur zjarr dy herë ndaj tij. Megjithëse i plagosur me një plumb, Çato kaarritur të ecë rreth 150 metra drejt mjetit të tij të parkuar, ku është gjetur më pas nga efektivët e policisë. Ai ndodhet në spital në gjendje të rëndë shëndetësore.

Lidhur me ngjarjen, policia greke ka vënë në pranga dy të mitur, 16-vjeçarin shqiptar Flavio Keqi dhe 16-vjeçarin grek Ioannis Karikis. Ata ndodheshin në shoqërinë e 38-vjeçarit në momentin e sulmit dhe u arrestuan për "mosbindje ndaj urdhrit të policisë" pasi tentuan të largoheshin, ndërkohë që autori i tentativës së vrasjes mbetet ende i paidentifikuar.

Nga verifikimet e kryera nga autoritetet helene, rezulton se Helis Çato ishte person i shpallur në kërkim. Ai ishte identifikuar si pjesë e një grupi kriminal të tregtimit të kokainës të goditur në qershor të këtij viti, operacion gjatë të cilit u sekuestruan armë zjarri dhe u goditën gjithsej 14 persona (11 shqiptarë dhe 3 grekë).