TIRANË — Vendosja e një sistemi të kontrolluar për menaxhimin e mbetjeve të rrezikshme, nga momenti i krijimit deri te trajtimi përfundimtar, është synimi kryesor i projektvendimit të ri të publikuar për konsultim publik.

Nisma e propozuar nga Ministria e Mjedisit përcakton rregulla të unifikuara për ambalazhimin, etiketimin, transportin dhe magazinimin, si dhe introduktimin e gjurmueshmërisë elektronike me qëllim parandalimin e keqmenaxhimit dhe uljen e rreziqeve për shëndetin publik e mjedisin.

Gjurmueshmëria elektronike dhe standardet e reja

Projektvendimi “Për ambalazhimin, etiketimin, transportin, gjurmueshmërinë, magazinimin e përkohshëm dhe dokumentin e dorëzimit të mbetjeve të rrezikshme” vendos detyrime direkte për krijuesit, zotëruesit, grumbulluesit, transportuesit dhe marrësit në dorëzim.

Një nga risitë kryesore është vendosja e gjurmueshmërisë elektronike përmes Sistemit të Integruar Mjedisor (SIM), ku çdo dokument dorëzimi do të pajiset me një identifikues unik elektronik. Dokumenti parashikon gjithashtu etiketa dygjuhëshe (“Mbetje të rrezikshme/ Hazardous Waste”), analiza nga laboratorë të akredituar dhe kushte të rrepta teknike për magazinimin e përkohshëm me qëllim parandalimin e rrjedhjeve apo zjarreve.

Ky projektvendim është hartuar në zbatim të ligjit “Për menaxhimin e integruar të mbetjeve” dhe përafron legjislacionin vendor me Direktivën e Bashkimit Evropian në kuadër të Kapitullit 27 “Mjedisi dhe ndryshimet klimatike”. Me hyrjen e tij në fuqi do të shfuqizohet kuadri ekzistues i vitit 2014, ndërsa subjekteve do t’u lihet një periudhë tranzitore prej gjashtë muajsh për përshtatjen me kërkesat e reja teknike dhe digjitale.