RROGOZHINË — Një aksident rrugor ku janë përfshirë tre automjete ka ndodhur gjatë ditës së sotme në autostradën Rrogozhinë-Lushnjë, duke shkaktuar vetëm dëme materiale.

Në ngjarje janë përfshirë një furgon mallrash dhe dy automjete veturë. Sipas verifikimeve të para nga Policia Rrugore, shkak për aksidentin është bërë një manovër e gabuar parakalimi nga drejtuesi i furgonit, i cili ka përplasur nga pas njërin prej mjeteve. Ky i fundit më pas është përplasur me barrierën anësore të betonit dhe me automjetin tjetër që udhëtonte në të njëjtin segment.

Si pasojë e përplasjes janë shkaktuar dëmtime materiale te të tria mjetet, ndërsa nuk raportohet për persona të lënduar. Efektivët e Policisë Rrugore kanë mbërritur në vendngjarje për të kryer veprimet hetimore dhe për të disiplinuar trafikun e rënduar përgjatë aksit me qëllim lehtësimin e lëvizjes së mjeteve.