BERGAMO — Një 32-vjeçar me origjinë shqiptare është arrestuar nga karabinierët në Itali, i dyshuar si i përfshirë në dy vjedhje banesash të kryera në zonën e Bergamos.

Operacioni nisi pasi forcat e rendit identifikuan një automjet të dyshimtë në Albano Sant’Alessandro dhe e ndoqën deri në Torre de’ Roveri, ku drejtuesi i mjetit mori dy persona që vinin nga zonat bujqësore.

Me mbërritjen e patrullave të përforcimit, tre personat braktisën automjetin dhe u larguan me vrap përmes fushave.

Gjatë ndjekjes, dy prej të dyshuarve arritën të largoheshin, ndërsa 32-vjeçari shqiptar u kap pas një përleshjeje me efektivët, ku mbeti i plagosur lehtë një prej karabinierëve.

Gjatë kontrollit, policia sekuestroi mbi 1.000 euro para të gatshme, disa bizhuteri ari, sende me vlerë, si dhe mjete të përdorura për hapjen e dyerve, përfshirë kaçavida, pincë prerëse, fleksibël dhe radio marrëse-dhënëse.

Gjyqtari i hetimeve paraprake në Bergamo vendosi caktimin e masës së sigurisë "arrest në shtëpi" me byzylyk elektronik për 32-vjeçarin, ndërsa vijojnë kërkimet për identifikimin e dy bashkëpunëtorëve të tjerë.