TRABZON — Futbollisti i Kombëtares Shqiptare, Ernest Muçi, është vlerësuar nga tifozët në Turqi me çmimin e golit më të bukur të javës pas paraqitjes së tij me fanellën e Trabzonsporit.

Sulmuesi 24-vjeçar kuqezi ishte protagonisti kryesor në fitoren 2-0 që Trabzonspori arriti në shtëpi përballë skuadrës së Gaziantep. Momenti vendimtar i takimit erdhi në minutën e 61-të, kur Muçi realizoi një gol spektakolar që vulosi rezultatin përfundimtar të ndeshjes.

Pas votimit të hapur për sportdashësit dhe tifozët në kampionatin turk, realizimi i shqiptarit mori shumicën e votave, duke lënë pas kandidatët e tjerë. Ky vlerësim konfirmon formën pozitive që po kalon 24-vjeçari në Superligën turke, në prag të grumbullimit me përfaqësuesen kuqezi për ndeshjet e muajit nëntor.