KUKËS — Mjegulla e dendur ka përfshirë qytetin e Kukësit dhe zonat përreth gjatë orëve të para të ditës së sotme, duke krijuar vështirësi të konsiderueshme në qarkullimin e automjeteve.

Fenomeni është shfaqur fillimisht në zonat e ulëta dhe në lugina, për t’u shtrirë më pas në të gjithë hapësirën e qytetit dhe në njësitë administrative përreth. Situata paraqitet veçanërisht problematike përgjatë aksit të Rrugës së Kombit, ku prania e mjegullës është më e dendur në segmentin rrugor Pobreg–Kolsh.

Për shkak të kufizimit të theksuar të fushëpamjes, autoritetet u kanë bërë thirrje drejtuesve të automjeteve të tregojnë kujdes të shtuar, të reduktojnë shpejtësinë e lëvizjes dhe të respektojnë distancën e sigurisë për të shmangur aksidentet e mundshme rrugore. Prania e mjegullës është një fenomen natyror karakteristik për zonën e Kukësit gjatë stinës së vjeshtës, veçanërisht në orët e mëngjesit.