Autoritetet në Iran kanë nisur përgatitjet për përballimin e emergjencave bërthamore, duke shpërndarë tableta jodi dhe udhëzime mbijetese për qytetarët në Teheran dhe në zona të tjera strategjike. Këto masa mbrojtëse merren në një kohë kur rriten shqetësimet për një përshkallëzim të ri ushtarak dhe për mundësinë e rifillimit të sulmeve nga Shtetet e Bashkuara nën drejtimin e Presidentit Donald Trump.

Sipas një raportimi të gazetës britanike "The Times", përgatitjet lidhen drejtpërdrejt me rrezikun e pasojave radiologjike nëse objektiv i goditjeve ushtarake do të bëheshin instalimet e ndjeshme bërthamore iraniene. Një zyrtar iranian i shëndetësisë konfirmoi se tabletat e jodit po shpërndahen kryesisht te banorët që jetojnë brenda një rrezeje prej dy deri në tre kilometrash nga këto objekte, ndërsa udhëzimet e mbrojtjes civile u kërkojnë qytetarëve të qëndrojnë në ambiente të mbyllura në rast krize.

Fokus kryesor i shqetësimeve ndërkombëtare mbetet kompleksi nëntokësor i njohur si "Pickaxe Mountain", i vendosur pranë zonës bërthamore të Natanzit. Pamjet satelitore tregojnë punime të vazhdueshme dhe tunelë të fortifikuar që shtrihen 80 deri në 100 metra nën sipërfaqe, çka e bën këtë objekt pothuajse të paprekshëm nga bombat depërtuese. Edhe pse qëllimi i saktë i këtij ambienti nuk është konfirmuar nga inspektorët ndërkombëtarë, mungesa e qasjes ka shtuar dyshimet për praninë e materialeve të pasuruara.

Ndërsa shpërndarja e ndihmave mjekësore pasqyron nivelin e lartë të alarmit në Teheran, kontaktet diplomatike mes Uashingtonit dhe Teheranit vazhdojnë të zhvillohen përmes ndërmjetësimit të Katarit. Megjithatë, situata mbetet e paqartë sa i përket mundësisë për të shmangur një konfrontim të drejtpërdrejtë ushtarak.