Industria e përpunimit të mishit në Shqipëri po përballet me një goditje të re në zinxhirin e furnizimit me lëndë të parë. Pas bllokimit të importeve të mishit të gjedhit dhe të pulës nga Brazili, Ministria e Bujqësisë dhe Zhvillimit Rural ka paralajmëruar rishikimin e marrëdhënieve tregtare me këtë shtet edhe për importin e mishit të derrit.

Njoftimi u bë publik nga ministri Andis Salla gjatë raportimit në komisionin parlamentar, ku sqaroi se vendimi vjen si pasojë e përafrimit të legjislacionit me standardet e Bashkimit Europian dhe rregullores së re zbatuese (BE) 2026/1189, e cila kufizon përdorimin e produkteve antimikrobike veterinare. Prej 3 shtatorit 2026, zbatimi i këtyre rregullave ka ndaluar hyrjen e mishit të viçit dhe të shpendëve nga Brazili, pasi ky i fundit është hequr nga lista e vendeve të autorizuara nga BE-ja.

Brazili ka qenë furnizuesi kryesor i tregut vendas për shkak të çmimeve konkurruese. Sipas të dhënave të INSTAT për periudhën janar-gusht 2026, Shqipëria importoi 32,4 mijë tonë mish dhe nënprodukte, ku 34% e sasisë vinte nga Brazili, e ndjekur nga SHBA-ja me 19% dhe Greqia me 17%.

Ndalimi i hyrjes së kësaj lënde të parë ka kthyer presionin e lartë mbi kompanitë përpunuese. Përfaqësuesi i industrisë, Drini Zusi, bëri me dije se blerja e lëndës së parë nga tregjet europiane apo vende të tjera alternative si Kanadaja, SHBA-ja apo Paraguai, kushton nga 12% deri në 40% më shtrenjtë. Për rrjedhojë, kostot e prodhimit parashikohet të rriten me 20-25%.

Industrialistët sqarojnë se kompanitë kanë shfrytëzuar rezervat dymujore gjatë shtatorit dhe tetorit, por duke nisur nga muaji nëntor dhe veçanërisht në dhjetor, rritja e kostove do të reflektohet te konsumatori final. Çmimi i mishit të freskët të viçit në tregun e pakicës pritet të rritet me 300-400 lekë për kilogram, duke arritur në 1,600-1,700 lekë/kg, ndërsa filetoja e pulës me shumicë parashikohet të shkojë deri në 450 lekë/kg nga 320-330 lekë që është aktualisht.

Për të zbutur këtë goditje, industria e përpunimit i kërkon qeverisë heqjen e tarifës doganore 10% për importet e mishit që vijnë nga vendet e BE-së si masë emergjente, si dhe akselerimin e procedurave shtetërore për plotësimin e standardeve të kontrollit veterinar, me qëllim hapjen e rrugës për eksportin e produkteve shqiptare drejt tregut europian. Kjo kërkesë për heqjen e taksës përballet me kundërshtinë e ekspertëve të blegtorisë, të cilët argumentojnë se heqja e tarifës do të dëmtonte më tej blegtorinë vendase, e cila po vuan rënien e vazhdueshme të krerëve të kafshëve.