Analisti Ilir Kulla, i ftuar në emisionin "Zonë e Lirë", ka komentuar raportet e tensionuara politike mes kryeministrit Edi Rama dhe kryetarit të Bashkisë së Tiranës, Erion Veliaj, duke analizuar pozicionet e të dyja palëve në këtë përplasje.

Sipas Kullës, palët ndodhen në kushte të pabarabarta force, mirëpo mesazhi i dhënë nga Veliaj paralajmëron nxjerrjen e të dhënave se çfarë ai di lidhur me funksionimin e pushtetit. Analisti nënvizoi se mazhoranca kërkon të shmangë krijimin e një situate të ngjashme me atë të ish-zëvendëskryeministrit Arben Ahmetaj, deklaratat e të cilit prodhuan hetime dhe arrestime zyrtarësh.

Më tej, Kulla u shpreh se Veliaj nuk ka më çfarë të humbasë politikisht pas izolimit të tij dhe largimit të njerëzve të tij besnikë nga struktura e bashkisë. Sa i përket ecurisë së procedimeve gjyqësore, analisti deklaroi se SPAK po vepron me pavarësi dhe jashtë kontrollit ekzekutiv, ndërsa theksoi se peshën më të rëndë të kësaj situate po e bart familja e kryebashkiakut.