Detaje të reja kanë dalë në dritë pas arrestimit në Athinë të 43-vjeçarit Nikolin Pali, i cili dyshohet se ka pranuar para autoriteteve greke autorësinë e vrasjes së dy vëllezërve Sejdin dhe Seldjan Vucaj. Ngjarja ka ndodhur në vitin 2002 në fshatin Shtoj i Vjetër të Shkodrës, përpara se i dyshuari të largohej nga Shqipëria.

Pali u ndalua pas gjashtë vitesh në kërkim për një tjetër vrasje të dyfishtë të kryer në Loutraki të Greqisë në vitin 2020, ku humbën jetën ish-partnerja e tij dhe një farmacist, krim për të cilin ishte dënuar më parë në mungesë me dy burgime të përjetshme.

Ndërsa autoritetet shqiptare dhe ato greke po verifikojnë pretendimet e tij për ngjarjen e Shkodrës, hetimet në shtetin fqinj po vijojnë për të zbardhur nëse i arrestuari është i përfshirë edhe në krime të tjera gjatë periudhës që qëndroi në arrati.