Policia e Kosovës ka shpallur zyrtarisht në kërkim Adnon Jasharin, të akuzuarin për vrasjen e 27-vjeçares Diana Kastrati, ngjarje e ndodhur më 18 maj 2011 në Prishtinë. Shpallja në kërkim dhe publikimi i fotografisë së të dyshuarit u bë me urdhëresë gjyqësore, në prag të seancës gjyqësore në mungesë të parashikuar për më 10 nëntor 2026.

Diana Kastrati u qëllua për vdekje me armë zjarri pasi kishte vendosur të ndahej nga i dyshuari, me të cilin kishte edhe një vajzë. Ngjarja shkaktoi reagime të shumta institucionale, pasi 22 ditë para vrasjes, e ndjera i ishte drejtuar Gjykatës Komunale në Prishtinë për urdhër mbrojtjeje urgjente, kërkesë e cila nuk u trajtua brenda afatit ligjor 24-orësh.

Pas një beteje të gjatë ligjore të nisur nga prindërit e viktimës kundër shtetit për mosveprim institucional, Gjykata e Apelit vendosi në vitin 2023 caktimin e një dëmshpërblimi prej 30 mijë eurosh. Autoritetet i kanë bërë thirrje qytetarëve që të përcjellin çdo informacion të mundshëm për lokalizimin dhe arrestimin e Jasharit, i cili akuzohet për veprën penale të vrasjes së rëndë.